NOVAS TEORÍAS EVOLUTIVAS:

As ideas de Darwin significaron un grande avance científico e cultural aínda que deixaron un problema sen resolver: na natureza existe unha gran variabilidade entre os individuos da mesma especie, pero cal é a causa desa variabilidade?

O neodarwinismo ou teoría sintética da evolución foi proposta por varios autores que a principios do século XX harmonizaron a teoría da selección de Darwin cos descubrimentos en xenética e outras áreas da bioloxía, como a bioquímica e a paleontoloxía.

PRINCIPAIS AXENTES DO NEODARWINISMO:

A causa da variabilidade biolóxica observada por Darwin débese ás mutacións e á recombinación xenética que se produce durante a meiose e que orixina novas combinacións de xenes nos descendentes.

A selección natural actúa sobre a variabilidade xenética. Os individuos dunha poboación son portadores de diferentes alelos responsables do seu fenotipo.

A selección natural actúa sobre estas variedades e tende a eliminar da poboación os fenotipos menos vantaxosos para as condicións ambientais, preservando os máis vantaxosos, que aumentarán a súa frecuencia na poboación e farán que esta poboación se adapte ao seu medio.

A evolución prodúcese gradualmente como resultado dos pequenos cambios nas frecuencias dos distintos alelos dunha poboación.

A unidade evolutiva non é o individuo senón a poboación.

TEORÍA NEUTRALISTA:

O neodarwinismo foi a teoría imperante ata 1970, pero non é a única teoría evolucionista aceptada actualmente. As teorías actuais da evolución propoñen unha alternativa á progresión dos cambios que suceden nas poboacións para que evolucione unha especie.

O xenetista xaponés Motoo Kimura propuxo a teoría neutralista ou neutralismo, que se basea en dous principios:

Moitos dos cambios que se producen no ADN son neutros á selección natural. A maioría das mutacións que sofren os xenes non teñen ningunha vantaxe nin ningún inconveniente desde o punto de vista da selección e, polo tanto, non varían o nivel de supervivencia dunha especie.

O azar, e non a selección natural, é o que produce as variacións. Unha mutación mantense ou non no tempo dependendo do azar.

TEORÍA DO SALTACIONISMO:

Esta teoría, proposta polos paleontólogos Stephen Jay Gould e Niles Eldredge, baséase en estudos paleontolóxicos e propón o seguinte:

A evolución das especies non ten lugar de maneira gradual e por unha lenta acumulación de pequenos cambios, senón que se produce de forma moi irregular, a saltos.

A ausencia de pasos intermedios no rexistro fósil, que os darwinistas atribúen a que é un rexistro fósil incompleto, corresponde á falta real destas formas intermedias.