OS PREHOMINIDOS:

A partir da desaparición dos dinosauros, distintos mamíferos e, entre eles, os primates, tiveron moito éxito reprodutivo.
Coñécense restos fósiles de especies de monos evolucionados de entre 7 e 5 millóns de anos, con notables progresos no bipedismo e ben adaptados a situacións cambiantes do clima.

OPRIMEIROS HOMINIDOS:

Hai aproximadamente 4,5 millóns de anos aparecen os primeiros homínidos, os australopithecus. Coñécense distintas especies: o Australopithecus anamensis, o Australopithecus africanus e o Australopithecus afarensis. A partir do primeiro diferéncianse dúas liñas, uns de tipo moi robusto, denominados parantropos (Paranthropus robustus e boisei), e outros máis gráciles, que serían os que se supón que van evolucionar cara ao xénero Homo.

Entre os fósiles máis coñecidos están un macho infantil coñecido como Neno de Taung (Australopithecus africanus) e a femia máis famosa, chamada Lucy (Australopithecus afarensis).
Os Australopithecus viviron en África na contorna dos bosques ou entre o bosque e a sabana arborizada.

Características físicas

A característica principal é que eran bípedes, xa que as pegadas das súas pisadas demostran que camiñaban dereitos.

Estes homínidos tiñan a cara ancha e plana e un cerebro un pouco maior que o dos chimpancés. As mandíbulas contiñan molares grandes e grosos, adaptados para triturar raíces e froitos secos. As súas pernas eran curtas. As femias non superarían o metro de altura e os machos, o metro e medio. As mans eran parecidas ás dos humanos e podían coller obxectos.