OUTRAS TEORIAS SOBRE A ORIXE DA VIDA:

TEORÍA DA XENESE MINERAL:

Na actualidade, a teoría de Oparin e Haldane segue a ser a máis aceptada para explicar a orixe da vida, aínda que perfeccionada e con algunhas modificacións.

É probable que fosen necesarios certos minerais que actuarían de soporte para permitir que as moléculas orgánicas pequenas se unisen entre elas e orixinasen as grandes moléculas biolóxicas. Crese que esta unión tivo lugar en zonas arxilosas e non na auga como se pensaba.

TEORÍAS DAS FONTES HIDROTERMAIS:

As fontes hidrotermais son fendas situadas nas proximidades das dorsais oceánicas a miles de metros de profundidade. Posúen unhas condicións de vida primitiva, mesmo tóxicas, semellantes ás que presentaba a Terra hai uns 4000 millóns de anos.

Son lugares escuros que carecen de luz e de osíxeno; con temperaturas extremadamente altas, superiores aos 300ºC; posúen unha elevada concentración de moléculas orgánicas e onde existen gases disolvidos coma o metano, o amoníaco e o dióxido de carbono, procedentes de erupcións volcánicas.

TEORÍA DA PANSPERMIA:

A teoría da panspermia foi defendida ao longo da historia por diferentes científicos.

Supón que os primeiros microorganismos (bacterias) que habitaron a Terra non se orixinaron aquí, senón no espazo exterior e chegaron ao noso planeta no interior dos múltiples meteoritos que chocaban contra a superficie terrestre. Logo, desenvolvéronse grazas ás condicións favorables que atoparon, e a partir delas formáronse o resto dos seres vivos.